Home > Cimphawng/Tuahkhak teng > Na Lungtang Sungah

Na Lungtang Sungah

Na Lungtang Sungah
(Into Your Heart)

Thangmualdung leh Zogam mualsang dawnte ah Phuitong leh Pakhoih tuamtuamte hong pak silsial in khuahun kiheidan zong hong kidanga tung sunni zong nidang bangin sa veva cihbangin hong omnawn loin hiuihdam hong nung hiauhiau hi. Khuahun zong nidang bang nawnlo in hong votpian hiauhiauta a nitak ciangin thangvan maimit suanleng  tung solkha leh si-al te tangzihziah in a laizang munkhat ah vuuklam pai-a vak heuhau ahih manin etlawm mahmah hi. Hicibang in khuahun hong kihei takteh i lungsim leh i khuahek zia nangawn hong kikhel, hong ki lamdanga i ngaklah mahmah Lungdambawl(Christmas) hong naita nahi khinkhian hi. Aw! Khuahun leh ni leh kha te na ngawnin i Honpa Zeisu hong suah hong lungdampih in tua a lungdamna uh imcip loin hong hilhsawn hong theisaksawn uh hi, cihnop huailiang hi.

Hicibang khuahunte hong tuntak teh pianna ZOGAM leitang leh pianna vangkhua lungsim leh mitkha bangah hong kilang duanduan zela, sabang tatna i sulnung kingai ngaungau thei hi. Tuacibang kawmkal ah i muh ngeinai loh BETHLEHEM Khua leh Betlen bawngkuangsung khawng I lungsim  leh I mitkha khawngah ki bawltawm khathei mawka, Awh!  leitung mite gumkhiading pa, tankhiading pa hici bang hun leh hici bangmun ah hong suakta lawmlawm kaci khaliang hi. Banghang peuhmah in hicibang mun ah hong suakta lawmlawm hiding hiam? cih ka ngaihsut tak ciangin ka lungsim ah thupawlkhat hongsuak ahihmanin tawm kikumsuk dih ni.

Octavia kicipa in BC 27-14 AD kikal leitung khempeuh uka, a  minthang mahmah banah uk dansiam ahih manin miten zong zahtak luauh hiam? laulua uh hiam? amin in zong sam ngamlo uha, Ceasar Augustus ci-in samlianguh hi. Tua ama uk hunsungin phiangsiah lakding zah leh galkap tumding zah theih nadingin a gamsung mi khempeuh Betlen khua ah kisimna nei dingin thupia hi. Tuamun ah Joseph leh Mary te nupa zong ava pailoh uh phamawh ahihmanin a khua uh Nazareth panin tai 80 banga a gamlat na munBethlehem” “House of Bread” eipau in “Khomun Inn ah  gaipha mahmah taleh vapaiteitei uh hi. Tulai  hong uk kumpi pawlkhatte dan in paikei leuh thuakdinguh aitam cihnophuai liang hi. Mary gaipha luata ahih manin lampai hamsa sa mahmah in khatvei lehkhawlzel paizel cihbang in hong pai teitei uhleh mipi nungah Betlen Khua hong tungkhong uh hi.

Mipi nungah hongtung uh ahihman in zintun nading mun awng nawnlo in munkhempeuh ah  mi dimkhin hihtuak hi. Mary anau neihding in hong tunsawnsawnta, hong nawh luata ahihman in tuabangpi mah in zintun nading mun Inn khatkhit Innkhat zongin hong paikawikawi uha, ahizongin muzo tuanlo uh hi. Tuacibangin aom laitak un mi hehpihthei khattawh ki tuakkha, ki mukha uha,  a Bawngbuksungah tungsak hi. (Ngaih nangtawh omleng munkhempeuh nuam e aci uhtam?). Anuam a anuam kei zongin anawh nain phata ahihmanin atun lohuh hong phamawh a, asawtlo in Mary nau hong suakpah hi. Tulaibangin nautun nading puanhoih leh nausil nading tuisiang cihbang om tadihlo ahihmanin ahi theibangin hong tuun nimnem uha, asialnading lawhpi cihbangzong omtuanlo ahihmanin Bawng ann neekna kuang(Manger) sungah hong sialmai uh hi.

Leitung mite honkhiadingpa ahihlam thei leuh bel zin tunnading mun aomkei phialzongin amau Inn on, a lupna tunguh on liang in limbawl peuhmahding uha, a-utkhempeuh in va enthei, va muthei, va biathei kholo khading hi. Bawng buksung ah hongsuak in Bawng ann neekna kuangsung ah Zeisu a kisialciangin mizawng daipam tuucingte leh gam tuamtuam pan a hong pai mipil mihau ten mukha  biakha uh hi. Bawngbuksung ah hong suak in Bawng ann neekna kuangsungah akisial ciangin mizawng mihai, mipil mihau kuamah kidei danna omloin a ennuam khempeuh in va enthei va biathei uh hi. Halleluiah. Tua bawngbuksung pen deidanna kitot kiselna omloh namun hongsuak hi.

Betlen Khuapen leisung Sumpian na leh na lamdang tuamtuam omna khua hihetlo napi in Topa Zeisu hong suah a kipan  kumsim in December Kha ciangin zin million 4 val neiden uha tua hangin akhua in sum leh pai akipan tampitak phat tuamlawh khan tohlawh uh hi, kici hi. Eite zong tuamun ah i vapaizawh i vaphakzawh nailoh hangin i lungsim ah ngaihsun in i mitkha ah bawlzel cihbangin iom thei hi. Ahi zongin amun vamuh vaphak leh niikten puansilh, ann-neek tuidawnte tawh lungdambawl ibawl idawn sangin i lungsimsungah, i lungtangsungah Zeisu i suahsakding i ten sakding thupizaw manphazaw hi. I lungtang sungah Zeisu hong suak in hong tektan taktak ciangin lungdam bawl taktak abawl i hipan ding hi. I nuntak nasung, I innkuansung, I pawlpisung, I minamsung leh I gamsung ah Zeisu hong suak bek hilo in hong tektang in ama deihna bang i zuih, i gamtat taktak ciangin  Betlen khuamah bangin nakpi takin i khangto zawlai ding hi.

Zeisu hongsuak hi
Zeisu hongsuak hi
Leimi khenpeuh gumkhia ding

Betlen bawngbuk sungah hongsuak hi
Betlen bawngkuang sungah kisial hi
Betlen bawngbuk sungah hongsuak hi
Hizong, tu-in nalungsung suaksak in

Honpa hongpai hi
Honpa hongpai hi
Nangle keigum khiading in

A simkha khempeuh tungah Topa Zeisu hongsuah lungdamna thupha hong tungkim tapeuh hen.

Mailed By Khaibawi

About these ads
  1. No comments yet.
  1. No trackbacks yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.