Christmas Message

IMMANUEL GOD WITH US.

Zeisu leh a Nungzuite hunin Zeisu Birth-day kibawl ngeilo hi. Nungzuite khatpeuh pahtakna Birthday Party zong kiza ngeilo hi. Hih pawi pen leitung Lawki kumpi ngeina panin hong piang ahi hi. A siangtho-in bawl leng siang ding a, lawki gamtat leng siahuai mahmah ding hi.
December-25 pen Roman Calendar sungah ” Dies Natalis Solis Invicti” ” The birth of unconquered sun.” ci-in, Ni-pasian suahni pahtawina pawi in zang uh hi. Khuahun siangtho pen ahihmanin pawithupi khempeuh December kha kizang hi.  Rome minam te’ Saturnia kici Ni-pasian pawi pen December leh January kalkakin zang hi. Yul kici German minamte lawm-anneek pawipi December khasung ahi hi. Scandinavia ten zongYule kici Lawki-pawi kumcinpawi thupi mahmah sak hi. Tuni dongin Christmas pen Yule pawi cilai uh hi.
Laisiangtho sungah Zeisu suahni kigen lo hi. Pasian in kisam salo hiding hiam, i thei kei hi. Poimawh leh teltak hong hilh dingin ka-um hi.  AD-200 Egypt laigelh sia Clement Alexandria in Decembe 25 ni-in Pashons pawi kibawl cih gen hi. AD-221 kumin Sextus Julius Africanus  gelhna-ah  Zeisu pen Mary in March-25 pawlin paii kipan a, December khasungin suak ci-in gen hi.  Christian kipatcil lamin Zeisu suah pen January 6, khawngin lamen uh hi.
Lawki Romance kumpite Christian  lam hong kihei ciangin, Italy Lawki-pawi Saturna pen Zeisu suahni Christmas pawi suaksak hi.  Amau pen Saturnalian kici a, Saturn bia minamte cihna ahi hi.  AD1200  kum aa kipanin December 25 -Jan6 kikal Christmas pawikham uh hi. AD-800 December25 ni-in, Charlemange kumpi-lukhu khusak uh hi. AD-855 December 25 in Edmund the Martyr kumpi suak hi. AD-1066 Dec25 ni-in King William 1 of England kumpi lukhu kikhusak hi. Leitung uk kumpite pawini tawh kizomtoto ahihmanin damdamin Christmas pen hong thupi semsem ahi hi.
AD-1377 kum Dec25 King Richarch II in Christmas pawi la-in, bawngtal 28 leh tuu 300 go hi. *Carol zanvakin lasa, laam, gualnopna leh kimawlna namkim, zune. Khat leh khat letsong kipia uh hi. Pawi nuam taktak hong suak mawk hi.
Reformation hong khang hi. Puritan ten England gambup huzaap uh hi. Puritan te’n Christmas pen Rome anti-christ pan hong pai pawi hi, ci-in 1647AD kumin khawlsak hi. Ahih hangin AD1660 kumin King Charles 11 in hong kik hi.
Leitung sumbawlna hoihpen.
Leitung sumzonna store khempeuh in hundang sangin a zahsawmin sum khawng zaw uh hi.Christmas Cards kizuak khia pen 1.9 billion bang pha hi. Christmas trees 20.8 million bang kizuak hi. Department tuamtuam ten Christmas pawisung decoration dingin, 20.8 billion to 31.9 billion bang zang uh hi.
Gualnopna Clubs khempeuh mi a lomlomin lut uh hi. Numei kizuakte tuktung bangin suntawh zantawh manlah mahmah hi. Leitung accident tampen hi. Million a simin nuntakna bei hi. Pa neilo naungek tam pian pen kha ahi hi. Kitot kithahna tampen hi. Stageshow tungah puansilhlo-in numei pasal gualnuam uh hi. A leii phenin a neel lemin, mipi lamnga-in hawt dakhdakh uh hi. A ente in a kamtawh agal panin nahuup uh hi.
Mipite a omna ciatah lungkimin tawnin diang uh hi. Dangkalai leh paklom henkhawmin  numei nawi tukleulau khawng deng phangphang uh hi. Pasal lante stage tungah kahto-in numeite dialkaih kawm tektekah $100 $50 lai anawk kha dingin vazep sese uh hi. Numeite in a lu manin taatin namsak sawnsawn hi. A nu taw namkha sialtal bangin hong kihei-in nui siasua lailai hi. Tua te in EMMANUEL a phawk ding uh hiam!
Christian lungsim
Mizawng tampite in noptuam lawh mahmah uh hi. US khua Block tuamtuamte ah Food Bank kihongin mizawng neek sam khempeuh in an vadawh hi. Anminsa vakna mun khua khempeuh ah om hi. Mizawngte aadingin Thriftshop munkhempeuhah kihong hi.  Mihau Christiante in million bei-in lawnkhia in mizawngte aading naseem uh hi. Inn neilote omna pia hi. Puan neilote puan pia hi. Nursinghome omna khempeuhah letsong tampi puak uh hi.
Zeisu muakna
Inn khempeuh, lampi-dung khempeuh, zum-inn khempeuh, colour namkim tawh kizemin , November kha aa kipan manlah mahmah uh hi. Mei bulb tang bangzah a bei tam! Meikhau kizang khempeuhtawh leitung vial leng vial bangzah a tung tam! Meitha meter bangzah Kero Watt bangzah a kizang tam! US gam lamdung khempeuh colour namkim tawh kizem zihziah hi. Zumpi khempeuh meipak tawh kituam hi. Building saang khempeuh mei-am kitung bangin zum zeza uh hi. Innmai, Department building, shoppingmall khempeuh supper-market khempeuh, phuitong pak, ngeisok pak, suangkua pak, bangin paklun ziaizuai in om hi. Tua meitaanghon lakah mihing aatheih miksi-hon khualzin bang ziaiziai tawntung uh hi.
Bangci muak ding ihiam? Mipil thumte bangin muak zaw ding ihiam? ei khensat ding hi.   ” Amah in tapa khat a nei dinga, amin ZEISU  kici ding hi….En in, nongaksiangtho in tapa khat nei ding a, amin ” EMMANUEL kici ding hi.” Matt 1:21-22. Leitung mite tawh hong teng khawm ding Pasian pen muaktak’ mahmah hi. Bangtawh muak ding ihiam? Bangtawh amah lungkim ding hiam? Leitung mite muakzia tawh Topa a lungdam zo diam?
Pasian ompih sangaa thupizaw mihingte hamphatna om ngeilo ding hi. Mihingte lakah Pasian hong om ding pen, tehpih ding omlo hamphatna ahi hi. Vantung mihonpite nangawn kamtai-in hong pai uh hi. Mihingte zak vantungmi choir pen Zeisu suahni a kisa la ahi hi. Vantungmite lungdam bangin lungdam lehang nuntak kilamdang ding hi. Ngaihsut paizia kikhel ding hi. Leitung kilemin nuam ding hi. Khat leh khat kihuatna kimuhdahna omlo ding hi. Leitung minthanna zaa leh minphatna khempeuh zumhuai kisa ding hi. Vantung hauhna ahi Hoihna leh Sianthona in hong tuam ding hi.
Hih pen Topa Zeisu hong pai a khatveina ahi hi. Anihveina zong a sawtlo-in hong tung ding hi. A husa kizaza zo hi. Vanpi kilokin lumdimdim khin hi. Mualte puakkhamin  meikuang leh meikhu pusuak hi.Leitung in a mawhna puazo nawnlo hi.  Mihing  zalom tullom thenlomin si ziahziah hi. Tuipi tuihualte kilokin awng uh hi. Leimaitang vaatin susia hi. Lamen lopi-in vanleengte  vanpan kia hi. Tembawte  tuipi sungah tum hi. Meileeng mawtaw kitaihin sisan leimaitang dimin luang hi. Leitung pen etkhatin muthei lecin et ngam huai lo hi. A sinailo deuh gallel aa liam nakliplip tawh kibang hi. A hun bei zo hi. Luphong kiklo ding hi.
” Topa in awlianpi tawh van pan hong kumsukin, vantungmite kikona taw, Pasian pengkul tumna tawh hong kum ding a, Zeisu Christ sungah a sisate hong thomasa ding uh hi. A nungta om eite tawh kigawmin meii tungah kilato ding hi” 1Thess4:16-17.
Christmas mei taan nitak, ko innkuan a tuam vilvelin kabuai dihdih uh hi. Tua ni pen vuuk sah mahmah a leimaitang khempeuh tuamin kaang pheuphau hi. Meitaangin a kap ciangin lengkik a, vantung muhkhopna dong tang eu-au hi. Muangpi hong tho-in, ” sun tawh kibang lamdang si, en un en un,” ci-in hong phong hi. San beba a, a liah omlo-in nakhempeuh kimu hi.
Mumang kawmtawh am phingphengin katho khia hi. Screen te lamto-in tawlet ah kadak hi. Meitang kimu kikeuhlo-in taan acihin tang beba kamuh ciangin kadip kua hi. Vantung ka-ento a muhkhopna dongin taang hi. ” Zeisu hong kum ahikha maitam” cihleh kapuanlum lenlakin kasilh hi.
“Zeisu hong pai taktak himawk leh, kapuanlum bek tawh a muak ding himai zen veng e.” ci-in kaphawk khat hong om hi.  Kipuahphat hun mahmah ta.  Zeisu a suun khempeuhte kila ding hi. Phil2:5-7.  ” Let this mind be in you, Which was also in Christ Jesus……….Zeisu Khazih sungah om lungsim bang note sungah om tahen.”

Pr Thang Siangh.

Posted on December 20, 2010, in Uncategorized and tagged . Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s