Christmas Messge From Felix Lian Khen Thang

Christmas Message from Bishop Felix (of Kalay Diocese)
Christ Topa sungah kong it Catholic thuzui u leh nau nu leh pate aw, Alungnop huai mahmah Christmas hun nuam sungah, lungnopna leh pumpi cidamna thupha tawh nakidimnangun deihsakna takpitawh thu kong nohset hi.

Christ Topa sungah kong it Catholic thuzui u leh nau nu leh pate aw,

Alungnop huai mahmah Christmas hun nuam sungah, lungnopna leh pumpi cidamna thupha tawh nakidimnangun deihsakna takpitawh thu kong ngetsak kawmin Christmas lungdamna thupha tawh kong nohset hi.

Mihingte hong kipiansakna tangthu en kik pak leng; Pasianin mihingte hong piansakna thubulpi pen Pasian abia ding, Pasian aphat ding leh tawntung nuntaknopsakna i ngahnading ngiimna ahi hi. Ahizongin mihingte in Pasian thupiakna te zuih ding sangin, amau kiliatsakna lungsim hangtawh Pasian thupiakna palsat in, Pasian’ gamhluah tanu tapa te hihna panin Satan dawimangpa ii sila kisuak hi.

Ahizongin, akitehthei lo itna lianpi anei TopaPasian in leivuipan a hong bawl amihingte ii thanemna te hong telsiam mahmah ahihmanin,mawhna panin mihingte hong hotkhiat kikna ding kam hong ciam hi. (Pian 3:15) Pasal pan a kibawl numei hangin, leitungah mawhna hong tun hangin, numei pan a, suak ding pasal hangin hotkhiatna hong pia ding cih lametna hong ngahsak hi. Hih thu hangin tanglai Israel minamte in Guppa Honpa Messiah hong pai ding kaal ngaklah in kumtulli sung bang nalamen uh hi. Tuhunciangin ahih leh Messiah Topa hong paina ih ngakna in kumtulli taang in nipi kaal li sung ih kiging khol a, tua hunpen “Adventu” hun, ih ci hi.

A siahuai tu hun nuntakna sungpanin, eite a hongsuahtak sakna dingin, eite’ PaPasian deihna tawh kizui-in, ih mawhna hangin tua Jesu Christu, amahmah ahong kipumpiak ahi hi.”(Gal 1:4) Leitung mawhna buanciim sungpan suahtak zawh loh man alungkia mite ih thanem lohna dingin, “haksatna” akici singlamteh ii liahah “Nopsakna”akici gualzawhna lukhu ih ngah ding lung gulhin, kiniamkhiatna tawh atawp dongin kip a, thuakzawhna ihneihna dingin Christu Topa in hong hanthawn hi.“Keimah tawh nahong kipawlna uh hangin lungnopna na neihtheihna dingun hih thute ahong gen ka hi hi. Leitungah gimna nathuak ding uh-hi. Ahizongin keimahin leitung nate zo khinta kahihmanin lungnuamin om un,”(Jn.16:33) hong ci hi.

“Topa painading lampi bawl unla, atotding lampi tangsak un. Kuamthuk khempeuh kivukdim dinga, muallian mualneu khempeuh kitotam ding hi. Lamkawite kitangsak dinga, alei humte kinelsak ding hi.” (Lk.3:4-5,Is.40:3-5). Honghonpa Messiah suahni, kilawmtaka ih muak theihna dingin Topa totnading lampi ahi, ihlungsimte ih kisittel ding hi. Lamkawi tawh kibang ihlungsimkawi te, ihgitlohna lungsimte phiatin, lungsimhoih lungsimpha ihnei ding hi. Kuam thuk tawh kibang, athanem, lametbei mite in thathak la in, ih kithakhauh sak ding hi.Mual lian mualneu te tawh akibang akiliansak, alungkhauh mite ngaihsutnate sukhamin, kiniamkhiatna lungsim tawh ihlaih ding hi. Leihamte tawh akibang huaihamna, hehna,hazatna, thangpaihna, muhdahna munte ah,awhmaisakna,thuakzawhna, theihsiamna,piakkhiatna, itna lungsimte mun ih pia ding hi. ‘‘Pasian in, leitungah, aTapa hong sawlna pen, mawhsakna thukhen dingin ahong paisak hilo in leitung mite ahonkhia dingin ahong paisak hi zaw hi.”(Jn.3:17)

Atawpna ah, honghonpa Christu suahni-in, kilawm kituaktak a Topa ihdawntheihna dingin, khat leh khat kikalah kilaitang natna ihneihkhak leh khat leh khat kithei siamin ki maisak ni. Ih mawh ih khialh nate kisikkik in hongsuak Topa tungah thuum ni. Ki-itna letsong kipiaciat ni. Tua hi leh Messiah Topa suahni Christmas pawi ihbawl thaman om pan ding hi. Hong suak Topa zong, lungkim mahmah ding hi.

Thuzui khempeuh adingin alungdam huai takpi Christmas hi ta hen.

Topa Pasianin hong suak Topa ii kilemna leh,akicing mawhmaisakna thupha hong buak suk ta hen.

Msgr.Felix Lian Khen Thang
Bishop of Kalay Diocese
25th December, 2010.

Posted on December 22, 2010, in Cimphawng/Tuahkhak teng, Photos, Zomi/Zogam thu and tagged , , . Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s