Zomi Movie Review: Sian Anglai Ah

sian ang laiah

Film: Sian anglai ah

Bawlkhia: Tears Gospel Video Ministry (TVM)

Director: Evan Lang Do Khup

Sum Beizah: US $ 5000

Zo Lasa :V.C Mang leh Nuamlek

Mithak lasak: Nuam leh Nembawi

Zomite lak ah kia hilo in Manipur a Zokam theilo Meitei te lak nangawn leh mun tuamtuam ah super HIT film ahi “Ngaih anglai ah” na bawlkhia Sia Do Khup makaihna a kibawlkhia mah ahi. Hih film pen naikal 2 a sau hitaseleh en dia PLAY na meek khit ciang in a beima tan nuamtak in ki ensuak ut pah hi.

A ngeina bang in pupa tawndan a dawksak kia hilo in Khristian biakna in Zomite nuntakna a hoihlam ah hong khek dan leh Cope topa (lord) hong nutsiat ei a ding a hamphathuai mahmah ZOLAI kum 100 a cingta toh kisai ki teltak in I phattuamna, hamphatnate I phawkna ding leh ciapteh nadingin video kibawl ahi hi.

Ei Zomite pen I ZOLAI in hong gawm ding cih upna Cope topa in na nei hi. Tuhun in zong i zolai mah puahpha le hang ei Sihzang, Zo, Phaileng, Teizang leh Lamka mite pumkhat suah kikna leh kitel thak kikna hong tut ding in upna lian mahmah hi. Lamka, Manipur ah zong tua bangmah in pau tuamtuam om hi. I khua leh bawngbawng a pau I ngaihnat luatna in kigawm ding hatsatna hong tun hi cih zong a kilangsak hi.

Cope topa hun lai a, Ukpite (Innpite) leh Tapidawte (Christian) kikal thute zong kihel hi. Hih bang thute hel theih nadingin Ukpite’ suan leh khak makaite in phalna a piak manin hih video pen picing tuam mahmah hi. Thangho leh Liando tangthu a lui luang banah Lentonghoih kisilna luita zong kidawksak in I Zo tangthu neihte thel bang hong thosak hi. Tua bek thamlo in Victoria mual zong a kicingtak in kilak hi.

Thangno (Cinlianthang), Cingno, Khualpu leh Pa Hang cih loh min hoih leh kilawm dang omlo hiam ci ing. Ngaih anglai series a bul pan kizang toto in hih film na ngawn ah kizang hi. Ahih hang in a limcingte (Actors) mi tuam ngen hong zang ahihman in flim star tampi I neihloh hi.

Film bawl pen Sia Khup in hong zoptoh jel na ding in thuum leh lamen hang. Bang hang thuum ding I cihleh, I minam ngeina te tuhun khangthak te a ding in kiciantak hong lakkhia in theihna hong guan ahihman in. Bang hang lam en ding, Sia khup in a film bawlte “anglai series” ahihna ah ‘tunnu anglai leh na anglai’ cih I kampaute omlai hi in maw…

Ka theih milmial dawi leh kau toh kisai ki ciantak in hong lak hi. Nidang in ko zong ka huandai uah ‘suangkua’ ka suan ngei uhi. Kau benkhiat na ding cih ciang in ka theilel a kau neite bii le hang thak/tak sa ahihna hong kilangsak a, a keih nu sung pan a pawtkhiat leh ama pumpi ah a lutkikna pen tulai technology zang in hong lakkhiat pen siam sa sese ing.

Phuisamna a zat a nungak nu samgzang tui in na taikha a nitum ma ngeingei a muhkik kul ahihdan leh Siampu kingaktak gige ahihloh na dawksak kia hilo in Pasian thu in kau hawlkhe thei hi. Leitung leh nna teng tung ah thunei ahihna kilangsak hi. A film ka etlai in hihbang in tawp ngel inte cih upna ka nei mok hi. Hong hi takpi. Ahihhang in hong kisau vei luatna in a nopna dau sak in thei ing. Khitui Gospel Team min a I theih English in Tears Gospel Video Ministry in a bawlkhiat ahihna ah TGVM cih ding a hoih hina pi TVM a ci uhi. Khitui luanna leh khasiatna pen a hang tuamtuam omthei ahihman in Tears toh Gospel khenlo hi ding in um ing. Tua in TGVM cih ding pen TVM cih hong suak hingel ding hi.

Dr JH Cope topa pen Sia Neng Dal in a limcing a, cope topa pau dan I ngaihsut leh Tedim LST kampau ki theisiam hi. Kampau bucing, complete sentence vive in pau se hi. Pha hi, pha hi cih bang hong zat “song lel buang pouh” ciang in ‘nuihzat huai lah lunglut huai’ khat suak hi. Phuisamna toh kisai a Vok muk atna, zuphihna, sisan toh kithoihna a taktak kimu nailo hileh zong muhna kineihloh hi.

Zawl kingaite pen hibang in kici thei uhi “mundang ah na leenglat ding peuh hong phal kei mawk hang ei. A bang ci hiam aw” kei zong “ tuabang seem”. A it theihna deihkhoplo in “a tamzaw in hong itthei leng ci ci lai ing ei. Nang a ka hihloh khak ding ngaihsun ngam vet keng” hong cih ciang in I koitak hiam khat hong dawtkha bang hi,

English te pen zek hau mahmahte ahihman un ei dawi leh zek toh kisai Cope topa in a theihsiam mahmah hi. Zi helna ding a ‘Zu thol piakna, genzia leh ki nolhkikdan’ zong hong lak hi.

A tangval pen kaunei nam na hi citciat se ahihman in khatvei a ngaihzawngnu’ nu hong petkha hi. Suangkhaw pak toh encian pah in, a ci thaksa ahihman in pet a om cih a cianta hi. Ngamatna Ngen (len)toh khuhna; kipuankhia ding in ngen uhi. A tangval pa’n bel a keih lam a theikei hi. I pu I pa gamh teng a luahsuk I hihleh lauhuai leh pilvan huai mahmah ding hitah ei maw cih ngaihdan hong neisak hi. Tua bang in kaunei ahi cih a kitheih ciang in a tangval pen Lou lamah a giak mang dildel hi. A puante lou nasep puan a bang kei deuh a hiven!

Ka pian phung dam tuibang sianglo a, na paal lo lah a himok ing ei ci in lakmai launkhi in a zeel hi.

Buktau ah lungzuanglua kisa in hong khuang ngeungeu hi:

“Ngaih toh ka ton nop man in ka tunnu aw,

Tuanglam nih ka, luitui bang gawm nuam ing e,

Tuanglam nih ka, luitui bang gawm nuam ing a,

Khohlo vangla gi ki zomsak nuam ing e”

A nungak pen ut hetlo himahleh pumzawn in Ni nungzui in pasal a neisak uhi. Ni nungzui pen na haksa thei mah hi inte hibang in damlohna a hong tuak ciang in hibang in kiho uhi. Hi bang toh “bang ci khosak ding I hiam? Hong ngailo lua maw?” cih kampau hong pawt zawzen hi.

Galngam dawi ai bang in a kiciam na uh “Pasal dang a neihsan leh gaal ten a (pasal) ngawng tan henla khomual ah a lu kisuangta hen” cih himok hi. Ki it kingai na ngawn I ki theihcian loh ciang in, ‘Ken bangtan na thuakkhin na theihloh pi’ cih banah ‘Ki awisam ciai maw’ cih theih mah hi.

Copte topa in ei Zomite nam niamcikte hong itna pen lamdang hi. Tua mah bang in nungak leh tangval kingaihna zong theih baih tuahlo hi. A nungak pa toh a zawlpa hong kikum uh a, ‘Bang ci gen ding I hia zawl cih in kikum ngekngek uhi. Siampu in a phuisam sa van toh a tat leh a nungak pen am biangbuang na pan a hong dai geih hi.

A kiciamna uh khauh lua ahihman in, Galngam dawi pen tua dawi mah in kibawl (kithoih) ding hong kul hi. Laitah theihna hileh zong, lampi dang omlo ahihman in hong hih ngam giap hi. Samzang botkhiat pen nithumni nitum ma in a lu tung ah koih kik ding cih ahi. Nitum ma in a muh keileh a ‘pai’ taktak ding ahihman in a nungak in, ‘na muta hiam’ ci in dot leh muh ding utlua leh hanciamlua ahihman in ‘ Mu naikei deuh ing ei’ a cise hi.

Sih ding ngak a nungaknu gim mahmah ta ahihman in ‘ka nuntakna a bei ma tan hong tawi in maw u Thang ci ngiau hi. Sun ni kei din na khawl aw. Lenmual liamlo aw. Lianu kha phamta ding; lung lau veng ka sen ngaih/tunnu aw, cih hong himok ahihman in Pa Hang hong kipan a, Siampu kiang ah ‘ka tanu hong bum lup sak himok ciai, na phung leh nam hong vat mang ding hi’ng’ a cihleh a zawl, Siampu in, ‘Pasian lungzai in thei in ciai. Kam thum pau leng ding gaw pah ding hite’ ci hi.

A tawp tung hihthih om nonlo a mangbang tak in a om laitak un Cope topa hong tung geih in. Pasian min in dawi leh kaute hawlkhia in damna a ngahta hi. Hi bang na lamdang a muh ciang in dawi siampu in a sepna nusia hi. Dawi leh kaute paikhe ding a I sung ah Khasiangtho teng ta ahihman in ‘dawi leh kau nei’ cih a om non kei hi.

Dr. JH Cope: 1882, Nov 21 in suak. 1908, Dec 21 in Zogam Haka hong tung. 1910, Nov 01 in Tedim hong tung a Zomite lak ah na hong sem in 1938, June 11 in a muan leh ama Na a sep Pasian kiang hong paisan ta hi.

Hih film tungtawn in ka muhkhiat khat: Mualsuang bawl na ding a suang leh cement hoihtak zang in sum tampi bei a bawl ahihsang in hibang a thu manpha Video in mual bawl ding mah hi ci ing.

Rating pethei ding a cinna nei hi leng tampi tak pe ding hi ing.

Ki zopna ding in khituigospel@gmail.com cih ahi a, a thu kicingzaw in http://www.tearsgospel.com ah TVM toh kisai thuthak kimu thei hi.

Posted on December 22, 2010, in Cimphawng/Tuahkhak teng, Videos and tagged , , . Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: